रौतहट, असार ४ – दुर्गा भगवती गाउँपालिका–२, पिपरा भलोहिया स्थित श्री सरस्वती माध्यमिक विद्यालयमा अन्तर्राष्ट्रिय योग दिवस २०२५ को अवसरमा भव्य कार्यक्रम सम्पन्न गरिएको छ। भारतको महावाणिज्य दूतावास, बिरगंज (नेपाल) तथा दुर्गा भगवती गाउँपालिकाको सहकार्यमा आयोजना गरिएको उक्त कार्यक्रममा विभिन्न विशिष्ट व्यक्तित्वहरूको उपस्थिति रहेको थियो।
कार्यक्रमका प्रमुख अतिथि मधेश प्रदेशसभा सदस्य तथा पूर्व मन्त्री कृष्णा यादव रहनुभयो भने विशिष्ट अतिथिको रूपमा मधेश प्रदेशका अर्थमन्त्री सुनील यादव सहभागी हुनु भयो।
भारतीय महावाणिज्य दूतावास, बिरगंजका काँसेलर, CG Group प्रतिनिधि, प्रदेशसभा सदस्य नगेन्द्र शाह, गाउँपालिका पूर्व अध्यक्ष अरुण शाह,उपा-अध्य्क्ष शिला देवी, वार्ड अध्य्क्ष प्रधुम्न चौधरी, सुरेश चौधरी,तथा जिल्ला सुरक्षाका निकाय प्रमुखहरू समेत कार्यक्रममा सहभागी थिए।
दुर्गा भगवती गाउँपालिकाका अध्यक्ष शम्भु सिंहले कार्यक्रमको सुरुआतमा स्वागत मन्तव्य राख्दै आफ्नै पालिकामा यति विशिष्ट अतिथिहरूको उपस्थिति गौरवको विषय भएको बताउँदै सबैलाई हार्दिक स्वागत र आभार प्रकट गर्नुभयो।
उहाँले योगको ऐतिहासिक महत्व र वर्तमान समयमा यसको प्रभावकारिता उल्लेख गर्दै योगले शारीरिक सन्तुलन, मानसिक शान्ति, र आत्मिक बल दिनुका साथै समुदायमा स्वास्थ्य चेतना फैलाउने उल्लेखनीय भूमिका खेलेको बताउनुभयो।
सहभागीहरूलाई विभिन्न योग आसनहरूको अभ्यास गराइयो भने कार्यक्रमलाई अझ प्रभावकारी बनाउन Patanjali, Unilever Nepal, र अन्य संस्थाहरूले सहकार्य गरेका थिए।
कार्यक्रमले स्थानीय तहमा योगप्रतिको जागरुकता बढाउने र स्वस्थ जीवनशैलीलाई प्रोत्साहन गर्ने उद्देश्य सफलतापूर्वक पुरा गरेको आयोजकहरूले जनाएका छन।
