मनसुनजन्य जोखिम न्यूनीकरणका लागि गौरमा कृत्रिम उद्धार अभ्यास सम्पन्न
रौतहट, असार २ -बिकास मिश्रा
सम्भावित मनसुनजन्य जोखिमलाई न्यूनीकरण गर्ने उद्देश्यका साथ रौतहटको गौरमा सशस्त्र प्रहरी बलले कृत्रिम उद्धार अभ्यास सम्पन्न गरेको छ।
जिल्ला विपद् व्यवस्थापन समिति रौतहटको समन्वयमा सशस्त्र प्रहरी बल, जिल्ला प्रहरी कार्यालय रौतहट, नेपाली सेना तथा अन्य सरोकारवाला निकायहरूको सहभागितामा गौर नगरपालिका–११ स्थित बरहवाको झोलुङ्गे पुल नजिक उक्त अभ्यास सञ्चालन गरिएको हो।
आगामी मनसुनमा औसतभन्दा बढी वर्षा हुने पूर्वानुमानका बिच उद्धार कार्यप्रति तयारी रहन अभ्यास गरिएको हो। अभ्यासमा नेपाली सेना, नेपाल प्रहरी, सशस्त्र प्रहरी बलका साथै विभिन्न संघसंस्थाहरू—जस्तै RDC Nepal, माण्डवी, रेडक्रस, नेपाल स्काउट लगायतको सक्रिय सहभागिता रहेको थियो।
कार्यक्रममा बोल्दै सुरक्षा निकायका प्रतिनिधिहरूले विपद् व्यवस्थापनमा एकीकृत तयारी आवश्यक भएको बताए। अभ्यासले विपद् अवस्थाको तत्कालीन प्रतिक्रिया तथा समन्वय क्षमतालाई मजबुत बनाउने अपेक्षा गरिएको छ।
