बिकाश मिश्रा
रौतहट, असार २० –
दुर्गाभगवती गाउँपालिकाको सहयोग र युवा नेपाल संघ, वीरगञ्जको आयोजनामा दुईदिने निःशुल्क मुटु स्वास्थ्य शिविर आजदेखि सरस्वती माध्यमिक विद्यालय, पिपरा भलोयिहामा सुरु भएको छ।
शिविरको उद्घाटन कार्यक्रममा युवा नेपाल संघका अध्यक्ष गौरव वर्माको अध्यक्षता रहेको थियो। दुर्गाभगवती गाउँपालिकाका अध्यक्ष शम्भू सिंह प्रमुख अतिथि रहेका थिए। उपाध्यक्ष शिला देवी, वडा नं. २ का अध्यक्ष सुरेश चौधरी, वडा नं. ३ का अध्यक्ष डी.के. झा, र वडा नं. १ का अध्यक्ष प्रधुम्न चौधरीको समेत उल्लेखनीय उपस्थिति थियो।
त्यसैगरी स्वास्थ्य शाखा प्रमुख दिनेश महतो र शिविरमा खटिएका सम्बन्धित विशेषज्ञ चिकित्सकहरूको टोलीले शिविर सञ्चालनमा महत्वपूर्ण भूमिका खेलेका छन्। उनीहरूले बिरामीहरूको मुटु सम्बन्धी परीक्षण, रक्तचाप मापन, परामर्श तथा आवश्यक औषधि वितरण गरेका छन्।
वडा नं. ३ का अध्यक्ष डी.के. झाले भने, “आजको समयमा प्रत्येक व्यक्तिले स्वास्थ्यप्रति सचेत हुनुपर्छ। यहाँ आएका प्रत्येक नागरिकले जाँच गराउनु अनिवार्य छ, किनभने रोग पहिचानको पहिलो पाइला नै बचाव हो।”
गाउँपालिका अध्यक्ष शम्भू सिंहले मन्तव्य दिँदै भने, “स्वास्थ्य नै सबैभन्दा ठूलो सम्पत्ति हो। यस्ता कार्यक्रमहरू गाउँपालिका र नागरिकबीचको सम्बन्ध अझ बलियो बनाउने माध्यम पनि हुन्। भविष्यमा पनि यस्ता स्वास्थ्य शिविरको निरन्तरता दिइनेछ।”
शिविरमा स्थानीय बासिन्दाहरूको उल्लेखनीय उपस्थिति देखिएको छ। दुई दिनसम्म चल्ने शिविरले स्वास्थ्य सचेतना फैलाउने र प्रारम्भिक उपचार प्रदान गर्ने उद्देश्य लिएको छ। आयोजक संस्था र स्थानीय निकायको समन्वयले कार्यक्रम सफल र जनपक्षीय बन्न पुगेको छ।
