बुद्धजयन्तीअगावै गौतम बुद्ध अन्तर्राष्ट्रिय विमानस्थलमा ठूला जहाज सञ्चालन हुने संस्कृति, पर्यटन तथा नागरिक उड्डयनमन्त्री प्रेम आलेले बताएका छन् । शनिबार विमानस्थलको अवलोकन गर्दै उनले बुद्धजयन्तीमा ठूला जहाजमा चढेर पाहुना आउने बताएका छन् । उनले भने, ‘फागुन ९ गतेभन्दा अगाडि नै क्यालिब्रेसन फ्लाइट हुन सक्छ, क्यालिब्रेसन फ्लाइटलगत्तै नेपाल एयरलाइन्सको ठूलो विमानबाट विमानस्थलको परीक्षण गरिनेछ ।’ त्यसपछि ४२ देखि ५६ दिनमा विमानस्थलमा नियमित उडान गरिने मन्त्री आलेले बताए ।
क्यालिब्रेसन फ्लाइटअगाडि ग्राउन्ड चेक, भिजिबिलिटी चेकलगायतको काम भइरहेको एरो थाईका नेपाल प्रतिनिधि विजेन्द्र श्रेष्ठले बताए । उनले भने, ‘अहिले प्राविधिकहरू विमानस्थलमा ग्राउन्ड चेकको काम गरिरहेका छन्, चार–पाँच दिनमा काम सकिएलगत्तै मौसम हेरेर क्यालिब्रेसन फ्लाइटका लागि जहाज ल्याइनेछ ।’
शनिबार भैरहवामा संस्कृति, पर्यटन तथा नागरिक उड्डयनमन्त्री प्रेम आलेसहित सार्वजनिक लेखा समितिका संयोजक भरतकुमार शाह, प्रतिनिधिसभा सदस्य प्रमोदकुमार यादवसहित प्राधिकरणका उच्च अधिकारीहरूले विमानस्थलको निरीक्षण गरेका थिए ।
